منهجية كتابة مقال ( جدل + استقصاء بالوضع ) باللغة العامية ( لتسهيل الفهم )

 💥 منهجية كتابة مقال ( جدل + استقصاء بالوضع ) باللغة العامية ( لتسهيل الفهم )

💥 من إعدادي : الأستاذ أنور سبحي

______________________

🎓 طريقة كتابة مقال بمنهجية الجدل باللغة العامية المتداولة 

✓ طرح المشكلة : 

- تمهيد عام حول الموضوع : هنا نهدرو على موضوع السؤال بصفة عامة ونديرو التعريف تاعو ، مثال : 

هل علاقة اللغة بالفكر علاقة إنفصال أم إتصال ؟ هنا الموضوع تاعنا على علاقة اللغة بالفكر ، نديرو تمهيد عام عليهم ونديرو التعريف تاعهم

- إبراز الجدال الفلسفي : هنا نديرو بلي كاين جدال بين الفلاسفة ، وعلى حساب المثال تاعنا : كاين لي يقول علاقة اللغة بالفكر إنفصال وكاين لي يقول إتصال ، وهنا نعطيكم نموذج : ولقد طرح موضوع علاقة اللغة بالفكر جدلا واسعا بين الفلاسفة والمفكرين ، فهناك من يرى أن علاقة اللغة بالفكر إنفصال ، وهناك من يرى أنها علاقة إتصال 

- طرح الإشكالية : هنا نصيغو السؤال لي مدوهولنا بصياغة وحدوخرا ، وعلى حساب المثال تاعنا نبدلو السؤال : هل القدرة على التفكير تتناسب مع القدرة على التبليغ ؟ وبمعنى آخر : هل اللغة عاجزة عن مسايرة ديمومة الفكر ؟

✓ محاولة حل المشكلة : 

- الموقف الأول : هنا نديرو أهم الفلاسفة والحجج والبراهين تاع الطرح الأول ، وهنا في السؤال بدالنا السؤال بالانفصال من الأفضل نبداو بيها ، يعني نديرو أهم الفلاسفة  والحجج والبراهين والاقوال تاع الفلاسفة لي يقولو علاقة اللغة بالفكر إنفصال ، والجملة لي يبداو بيها الموقف : يرى العديد من الفلاسفة والمفكرين وعلى رأسهم ( أهم الفلاسفة ) أن .... ( الطرح تاعهم ) ، حيث اعتبر ( فيلسوف من فلاسفة الطرح ) أن .... ( الرأي تاعو ) ، وهذا ما أكده في قوله : " ....... " ، وعلى حساب المثال تاعنا : يرى العديد من الفلاسفة والمفكرين وعلى رأسهم ( أفلاطون ، ديكارت ، هنري برغسون ، إبن سينا ) أن علاقة اللغة بالفكر علاقة إنفصال ، حيث اعتبر ( أفلاطون ) أن ...... ( حجة أفلاطون ) ، وهذا ما أكده في قوله : " ............. " 

- نقد وتقييم : هنا نذكرو العيوب والنقائص لي تغافل عليها الموقف الأول ، وكاين جملة بزاف يبداو بيها النقد وهي : إن ما ذهب إليه هذا الطرح أمر مبالغ فيه ، لأن .... ( عيوب الموقف ) 

- الموقف الثاني : هنا نديرو أهم الفلاسفة والحجج والبراهين تاع الطرح الثاني ، وهنا في السؤال بدالنا السؤال بالمادية ، يعني نديرو أهم الفلاسفة  والحجج والبراهين والاقوال تاع الفلاسفة لي يقولو علاقة اللغة بالفكر إتصال ، والجملة لي يبداو بيها الموقف : من جهة أخرى ، يرى العديد من الفلاسفة والمفكرين وعلى رأسهم ( أهم الفلاسفة ) أن .... ( الطرح تاعهم ) ، حيث اعتبر ( فيلسوف من فلاسفة الطرح ) أن .... ( الرأي تاعو ) ، وهذا ما أكده في قوله : " ....... " ، وعلى حساب المثال تاعنا : يرى العديد من الفلاسفة والمفكرين وعلى رأسهم ( دوسوسير ، ميرلوبونتي ، هيغل ، هاملتون ، لافيل ، جوليا كريستيفا ) أن الذاكرة علاقة اللغة بالفكر هي علاقة إتصال ، حيث اعتبر ( دوسوسير ) أن ....... ( حجته ) وهذا ما أكده في قوله : " ........... " .

- نقد وتقييم : هنا نذكرو العيوب والنقائص لي تغافل عليها الموقف الثاني ، وكاين جملة بزاف يبداو بيها النقد وهي : إن ما ذهب إليه هذا الطرح أمر مبالغ فيه ، لأن .... ( عيوب الموقف ) 

- تركيب أو تغليب أو تجاوز أو تركيب تجاوزي : 

هنا على حساب كل مقال ، كاين لي يجي تغليب وكاين لي يجي تركيب وكاين لي يجي تجاوز ... ، تركيب : معناه الموقفين في زوج صحاح ، تغليب : معناه واحد في الموقفين صحيح ، تجاوز معناه نجيبة موقف ثالث ومعناه  أنو الموقفين في زوج غالطين ، وتركيب تجاوزي : معناه الموقفين في زوج صحاح ولكن الموقف الثالث لي جبناه ثاني صحيح ، يعني في ثلاثة صحاح ، وعلى حساب مثالنا هنا يصلح تغليب : ومن خلال ما سبق نستنتج أن علاقة اللغة بالفكر علاقة إتصال ضروري .... نشرحو ونجيبوا مثال واقعي وندعموه بفيلسوف جديد ما درناه قبل في الموقف لي يقول علاقة إتصال ...

✓ حل المشكلة : هنا نأكدو اذا كات تركيب أو تغليب أو تجاوز ، وعلى حساب مثالنا : في الأخير يمكننا القول بأنه لا يمكن الفصل بين اللغة والفكر ، ونشرحوا شويا وندعموا الخطوة هذي بمثال أو قول فلسفي

📚📚📚📚📚📚📚📚📚📚📚📚📚📚

🎓 منهجية كتابة مقال الاستقصاء بالوضع باللغة العامية المتداولة 

الاستقصاء بالوضع يجينا السؤال مثلا يقولنا : أثبت برهن ، برر .

مثال : أثبت الأطروحة القائلة أن ( النسيان حالة صحية )

✓ طرح المشكلة  :

- تمهيد عام كيما لجدل ( هنا مثلا نهدرو على النسيان بصفة عامة )

- هنا كاين فكرة شائعة وفكرة نقيض ماشي كيما الجدل لي فيه إبراز الجدال الفلسفي : بعد التمهيد :  ولقد شاع لدى الفلاسفة والمفكرين بأن ( عكس الأطروحة ) بأن النسيان حالة مرضية سلبية معيقة للتكيف 

- ضرك تجي الفكرة النقيض : ولكن هناك فكرة تناقضها ( الأطروحة لي رايحين دافعو عليها ) ترى أن النسيان حالة  صحية إيجابية تؤدي إلى التكيف ...

- منبعد ديرو الإشارة إلى الدفاع : وتبدو هذه الأطروحة صحيحة ومشروعة وجب الدفاع عنها بحجج وبراهين شخصية

- منبعد تطرح التساؤل : كيف يمكن الدفاع عن الأطروحة القائلة بأن"  النسيان حالة صحية " 

_____________________________

✓ محاولة حل المشكلة : 

- الموقف الأول فلجدل يتبدل اسمو في الاستقصاء نسميوه عرض منطق الأطروحة ( هنا الأطروحة لي قالكم دافعو عليها ) ، وهنا نديرو الحجج والبراهين وأهم الفلاسفة كيما الجدل ، وعلى حساب المثال تاعنا ( النسيان حالة صحية ) ، يعني هنا نديرو الحجج والبراهين والأقوال والأمثلة لي يثبتو بلي النسيان حالة صحية 

- هنا مكانش نقد الموقف الأول كيما الجدل ، يعني مكانش أصلاً نقد بعد عرض منطق الأطروحة خطراكش محال ننقدو حاجة رايحين ندافعو عليها

- منبعد الموقف الثاني لي فلجدل يولي اسمو عرض منطق الخصوم ، يعني الأطروحة المضادة والشائعة ولي هي هنا حسب مثالنا ( النسيان حالة مرضية ) ، مي هنا كاين ملاحظة وهي أنو لازم نديرو عرض منطق الخصوم ملخص أو نديرو غير فيلسوف واحد برك ونشرحو رايو برك بلا ما نكثرو في الحجج تاعهم .

- هنا نديرو نقد منطق الخصوم ( نقد النسيان حالة مرضية ) ، لأنو رايحين رايحين ندافعو على عرض منطق الأطروحة ولازم علينا ننقدو عرض الفكرة المضادة باش نبطلوها .

- هنا في بلاصة التركيب تاع الجدل يجي الدفاع عن الأطروحة بحجج شخصية ( النسيان حالة صحية ) ، وهنا نقدرو نستعملو أمثلة واقعية ولا فيلسوف ما درناهش في عرض منطق الأطروحة نقدرو نديروه هنا ونشرحو الموقف تاعو : ومن هنا إن الأطروحة القائلة بأن النسيان حالة صحية صحيحة ولنا أدلة كثيرة تثبت ذلك أهمها أن ...

______________________________

✓ منبعد تجي حل المشكلة : إن الأطروحة القائلة بأن النسيان حالة صحية صحيحة ومشروعة وجب الأخذ بها وبرأي مناصريها ودحض خصومها..... ونشرحو شويا ولا نجيبو مثال باش نتوسعو في الخطوة هذي .

______________________________

* وكمخطط عام : 

✓ طرح المشكلة : 

- تمهيد وظيفي حول الموضوع 

- إبراز الفكرة الشائعة

- ابراز الفكرة النقيض 

- الإشارة إلى الدفاع 

- طرح التساؤل : كيف يمكن الدفاع عن الأطروحة القائلة أن ( .... ) ، كيف يمكن إثبات ، كيف يمكن تبرير ....

✓ محاولة حل المشكلة : 

- عرض منطق الأطروحة ( الأطروحة المراد الدفاع عنها ) 

- بدون نقد 

- عرض منطق الخصوم ( الأطروحة المضادة ) ولكن ملخصة فقط 

- نقد منطق الخصوم شكلا ومضمونا 

- الدفاع عن الأطروحة ( المراد الدفاع عنها ) بحجج شخصية 

- حل المشكلة